الكائنات الفضائية، فكرة انشغل بيها البشر من فجر التاريخ، هل احنا لوحدنا في الكون؟ هل زارتنا إحدى الحضارات الفضائية؟ هل الأرض مُميزة بالدرجة ديه؟ هل فيه حياة تانية على كواكب تانية غير كوكبنا؟ لو هما موجودين، هما فين؟ كُل ده هنجاوب عنه وأكتر في مقالنا بالعامية عن…«الفضائيين».
الإشاعات:
انتشرت إشاعات كتير حولين الكائنات الفضائية ووجودهم وزيارتهم للأرض وحتى اختطاف بعض الناس! لكن ايه مدى صحة الإداعاءات ديه؟ تعالوا نشوف اشهر الظواهر الغريبة اِلي بيتم تفسيرها على إنها فِعل من الـ«فضائيين».
حادثة روزويل:
واحد من أشهر الشائعات والأخبار اِلي انتشرت حولين العالم كُلوا عن الفضائيين، كانت في الولايات المُتحدة في مطلع خمسينيات القرن الماضي -1947 تحديدًا- في حادثة تاريخية صداها بيتردد لحد يومنا ده.
في نهار 8 يوليو سنة 1947 على بُعد حوالِ 120 كم من مدينة روزويل في ولاية نيو ميكسيكو، صاحب مزرعة أبقار اسمه (ماك برازيل-Mac Brazel) لقى حاجة في حظيرة الخرفان، وصفها: «فوضى من العِصي الحديدية مربوطين مع بعض بشريط لاصق، وكتلة من البلاستيك والورق الفويل، وخردة من معدن ثقيل المس شبيه بالورق». ماك اتصل بشريف بلدة روزويل، اتصل الشريف بدوره بظُباط في قاعدة جوية قريبة من روزويل. جِه الجنود وانتشروا في كُل مكان وبدأوا يجمعوا الحُطام الغامض ويحطوه في مُدرعات وينقلوه. كان الخبر بيتصدر العنواين الرئيسية في روزويل. في التاسع من يوليو صرح احد ظُباط القوات الجوية لاحد الصُحف: «الجسم الطائر الغامض ما هو إلا منطاد طقس تحطم».
بس واضح إن التصريح ده ماعجبش مُحبي نظرية المؤامرة، بعض الناس آمنوا –ولا يزالوا يؤمنوا- إن ده كان حُطام مركبة فضائية زارت الأرض، وإن الحكومة الأمريكية مُحتفظة بيها وبالكائنات الفضائية في القاعدة السرية «Area 51».[1]
المنطقة 51:
في صحراء نيڤادا الحارقة بجانب بُحيرة جرووم الجافة، تقع المنطقة 51. المنطقة 51 واحد من أشهر القواعد العسكرية في العالم اِلي مش موجودة رسميًا. بالرُغم من إنك تقدر تشوف عدة مباني مُعقدة من خلال صور الأقمار الصناعية، إلا إنها مش موجودة في اي خريطة رسمية للولايات المُتحدة. لعقود، مُحبي نظرية المؤامرة و مُحبي الصحون الطائرة، كانوا بيدَّعوا إن الحكومة الأمريكية بتستخدم المنطقة 51 لإجراء تجارب على الكائنات الفضائية والتكنولوجيا الخاصة بيهم، وتم ربط بين المنطقة والتحطم اِلي حصل بالقُرب من روزويل. بيدَّعي ناس تانية إنه تم تصوير «فيلم إسطورة الهبوط على القمر» في الصحراء ديه.طبعًا الكلام أستهزاء بالعقول، بس إذا كان ده مش حقيقي، اومال ايه اِلي حقيقي؟
لسنين كتير، الـCIA والقوات الجوية الأمريكية كانوا بيستخدموا المنطقة 51 كقاعدة إطلاق طائرات تجريبية طبقًا لوثائق إتنشرت في 2007. في الخمسينيات والستينيات كانت القاعدة مُصنفة شديدة السرية بسبب إستخدامها في برنامج عسكري سري في عصر الحرب الباردة يُسمى (اوكسكارت-Oxcart)، واِلي استخدمت لتطوير طائرات تجسس غير قابلة للكشف بالرادار. كانت الطائرات في العصر ده متطورة وشكلها غريب اِلي ساعد –بجانب سرية المنطقة ايامها- بنشر الشائعات وانتشارها عن الكائنات الفضائية. [2]
دوائر الحصاد:
أيضًا من الإشاعات المشهورة واِلي بيتم نسبها للكائنات الفضائية –اصل الكائنات الفضائية سافرت مليارات الكيلومترات عشان ترسم على الزرع وتخوف الناس- من قِبل مُحبي نظرية المؤامرة. دوائر الحصاد موجودة فعلًا، لكن مش إخطبوط فضائي ذكي اِلي عملها، طب مين؟
زمان كانت دوائر الحصاد بتجذب السُياح من حولين ارجاء العالم وانتشرت إشاعات حولين إنها رسايل من الكائنات الفضائية وراها معاني رياضية مُعقدة. أغلب العُلماء دلوقتي بيتفقوا على إنها من صنع البشر. (ماثيو ويليامز-Matthew Williams) هو أول شخص يِتحاكم لتخريب المحاصيل أثناء رسمه للدوائر، وتحزّن على مستوى الإنحدار اِلي وصل لهُ رسم دوائر الحصاد بسبب الهواة اِلي بيرسموا مُجرد دوائر ومُربعات هِنا وهِناك.[3]
كلام هنا وكلام هناك، وإشاعات ونظرية المؤامرة والغزو الفضائي، حكومات بتخفي وحكومات بتعلن، أنا دماغي تاهت.
طب ايه رأيكوا نشوف رأي العِلم في الكائنات الفضائية بعيدًا عن الحكومات والمؤامرات وتجارب الرُز باللبن؟ تعالوا نشوف.
العِلم:
مجموعتنا الشمسية:
كُلنا عارفين طبعًا إن الحياة الوحيدة اِلي نعرفها موجودة في قلب مجموعتنا الشمسية –وفي الكون- هي على كوكب الأرض، بس السؤال الأزلي جت منين؟
المريخ: من حوالِ 4 مليار سنة يَعتقد العُلماء إن المريخ كان مُغطى على الاقل خُمسه بمُحيط مائي عُمقه أكتر من حوالِ 300 متر. بس المياه لوحدها مش هتنشئ الحياة لازم وقت، المياه إستمرت على سطح المريخ لفترة قدرها حاولي 200 مليون سنة، بمعنى إن مع اول ظهور بدايات للحياة على الأرض، كان المريخ بيخسر آخر بُحيراته. [6][4]
بتقترح إحدى الدراسات إن الحياة على الأرض اصلها كوكب المريخ، وبتقترح إن عُنصر الموليبدينوم المؤكسد قد يكون مُتصل بأصل الحياة، اِلي كان مُتوفر على المريخ دون الأرض.
في سبتمبر اِلي فات، أعلنت ناسا رسميًا وجود المياه السائلة على سطح المريخ، وبتقترح إحدى النظريات وجود بيئة حية تحت سطح المريخ.[5][6]
يوروبا:
قمر العملاق المُشتري الصغير، المُغطى بالعديد من الخطوط والنطوءات البُنية المائلة للحُمرة اِلي بيُعتقد إنها بتشير للأماكن الأكثر دفئًا تحت سطح القمر، فيه مُحيط من المياه السائلة أكثر من المياه اِلي على الأرض، اِلي مُمكن تكون بتستضيف الحياة. وكالتيّ الفضاء الأمريكية والاوروبية بيعملوا مع بعض على مشروع تكلفته حوالِ نُص مليار دولار لإرسال بعثة إستكشافية لتحت سطح القمر يوروبا. [6]
إنكليودوس:
فيما ما وراء المُشترى، قمر زُحل إنكليودوس، اِلي اكد العُلماء وجود مُحيط مائي ضخم تحت سطحه الجليدي الخارجي.
زي يوروبا، مُحيط إنكليودوس يُمكن أن يكون بيستضيف الحياة الفضائية.
في 2015، تم نشر ورقتين علميتين بيؤكدوا بشدة وجود طاقة كيميائية حرارية –زي اِلي بتدعم الحياة في مُحيطات الأرض العميقة- موجودة تحت سطح القمر. [6]
تيتان:
قمر تاني من أقمار زُحل، تيتان الجسم الوحيد المعروف بجانب الأرض في مجموعتنا الشمسية، اِلي عليه بُحيرات سائلة على سطحه، لكن البُحيرات ديه مش زي المياه اِلي عندنا، ديه بُحيرات من الميثان السائل –الغاز الطبيعي-. اقترح العُلماء إحتماِلية وجود حياة على تيتان لكن مش زي اِلي عندنا، هتكون حياة وخلاية بتعتمد على الميثان بدون الاوكسجين. [6]
في إحتماِلية كَمان وجود الحياة الميكروسكوبية على المُذنبات والنيازك في مجموعتنا الشمسية، واِلي يُحتمل تكون اصل الحياة.[6]
ما وراء المجموعة الشمسية:
عُمر الكون حوالِ 13.8 مليار سنة[7] عُمر المجموعة الشمسية حوالِ 4.6 مليار[7] سنة عُمر الأرض حوالِ 4.5 مليار سنة [8] بدأت الحياة على الأرض من حوالِ 3.5 مليار سنة [9]، مُقارنة بين عُمر الأرض والحياة، بعُمر الكون: هنلاقي إن الفترة اِلي عُمال ما اتكونت الحياة على الأرض بعد ولادة الكون، في إحتماِلية إن فيه حضارات قامت وانقرضت كَمان، الإنسان الحديث اتوجد على الأرض من حوالِ 2.5 مليون سنة [10] احنا بالنسبة للكون أطفال بنحبوا.
طيب إذا كُنا بالعُمر المُبكر ده والبدائية ديه، فين الحضارات التانية؟ وهنا يجي دور (مُفارقة فيرمي-Fermi’s Paradox).
مُفارقة فيرمي:
أدرك فيرمي إن اي حضارة بتكنولوجيا الصواريخ البدائية بتاعتنا، في خلال 10 مليون سنة تقدر تستعمر المجرة باكملها ويكون كُل نظام شمسي تحت ظل الإمبراطورية الفضائية ديه. أكيد زمانك بتقول دلوقتي 10 مليون سنة؟ ده احنا نكون اتحلل فينا كُل ذرة. اي نعم إن 10 مليون سنة فترة طويلة، لكن مُقارنةً بعُمر المجرات اِلي بيُقدر بمليارات السنين، هي فترة كافية جدًا. إذا كان ده الحال، فين أباطرة درب التبانة؟ أدرك فيرمي على الفور إن اي حضارة فضائية كان عندها الوقت الكافي وزيادة إنها تستعمر المجرة. فسأل نفسه حينها سؤال: «هما فين كُلهم؟».[11]
طب بلاش يكونوا استعمروا المجرة، ولا حتى استعمروا القمر بتعهم، فين إشاراتهم؟
هنا يجي دور ما يُسمى بـ(مُعادلة درايك-Drake’s Equation) وهي:
N = R* fp * ne* fl * fi * fc * L
حيث N هي عدد الحضارات اِلي طورت اجهزة إرسال واستقبال كهرومغناطيسية.
R هو مُعدل النجوم المُستقرة القابلة لإستضافة الحياة الذكية.
fp هو عدد النجوم مع كواكب حوليها.
ne عدد الكواكب اِلي مُمكن إنها تستضيف بيئة مُستقرة تسمح بنشوء الحياة.
fl عدد الكواكب اِلي فعليًا مُمكن تضيف حياة.
fi عدد الكواكب اِلي تطور عليها حياة ذكية.
fc عدد الحضارات اِلي طورت اجهزة ارسال واستقبال.
L طول المُدة اِلي هتستغرقها الإشارة في الفضاء للوصول لينا.
أكيد ولا واحد من النسب اِلي فوق ديه معروفة بالتأكيد، اِلي بيخلي التدوير على الحياة الذكية آمر صعب بشدة ويُصبح مُجرد تخمينات.[12]
أقرب كوكب لينا مُمكن إنه يكون يستضيف حياة هو الكوكب (Wolf 1061c)، يقع في المنطقة القابلة للحياة ويبعُد عنا حوالِ 14 سنة ضوئية، يعني اي إشارة لاسلكية من اي حضارة قامت على سطح الكوكب ده، هتوصلنا خلال 14 سنة.
نفس الأمر بالنسبة ليهم، لو اي إشارة احنا بعتناها في الفضاء، فهي هتكون وصلتلهم في خلال 14 سنة.[13]
يعني من الآخر وجود او عدم وجود الكائنات الفضائية شئ غير مُؤكد منه ويظل مُجرد ترجيحات وتخمينات.
بس اِلي مؤكد منه، إن مفيش كائن فضائي بمجسات بيجي يلعب بالمحاصيل ويخوف الناس، ويركب اطباق طايرة معدنية بتلف.
إعداد: Ahmed M. Gawish
مُراجعة علمية:Mohamed S. El-Barbary
تصميم: Ahmaad M. Hanafi
References
Roswell – Facts & Summary [Internet]. HISTORY.com. [cited 2016 Feb 27]. Available from: http://sc.egyres.com/WE5IU
Staff H com. What goes on at Area 51? – Ask History [Internet]. HISTORY.com. [cited 2016 Feb 27]. Available from: http://sc.egyres.com/xOh9r
Jani L. Crop circles demystified: how the patterns are created [Internet]. [cited 2016 Feb 27]. Available from: http://sc.egyres.com/SBvLb
Correspondent PGS, News BBC. Is there life on Mars? [Internet]. BBC News. [cited 2016 Feb 27]. Available from: http://sc.egyres.com/bNptf
Wall M, 28 SW| A, ET 2013 06:05pm. Earth Life Likely Came from Mars, Study Suggests [Internet]. Space.com. [cited 2016 Feb 27]. Available from: http://sc.egyres.com/MDf1v
Orwig J, Oct. 24 2015, 655 990, 21. The 15 most compelling scientific findings that suggest aliens are real [Internet]. Business Insider. [cited 2016 Feb 27]. Available from: http://sc.egyres.com/G95Ca
WMAP- Age of the Universe [Internet]. [cited 2016 Feb 27]. Available from: http://sc.egyres.com/LMxn4
Precious Earth- NASA Science [Internet]. [cited 2016 Feb 27]. Available from:
http://sc.egyres.com/AL59q
Near-Earth Objects and Life On Earth [Internet]. [cited 2016 Feb 27]. Available from: http://sc.egyres.com/97gM5
Wilford JN. When Humans Became Human. The New York Times [Internet]. 2002 Feb 26 [cited 2016 Feb 27]; Available from: http://sc.egyres.com/wsi57
Fermi Paradox | SETI Institute [Internet]. [cited 2016 Feb 26]. Available from: http://sc.egyres.com/VirqX
The Drake Equation | SETI Institute [Internet]. [cited 2016 Feb 26]. Available from: http://sc.egyres.com/pe06d
JPL.NASA.GOV. The nearest potentially habitable planet to Earth [Internet]. [cited 2016 Feb 27]. Available from: http://sc.egyres.com/M9vZH
